وفاقی محتسب سیکرٹریٹ کا وجود غیر قانونی قرار،ایک لاکھ روپے جرمانہ عائد
اسلام آباد: سپریم کورٹ نے وفاقی محتسب سیکرٹریٹ کا وجود غیر قانونی قرار دیتے ہوئے اس کو ایک لاکھ روپے جرمانہ کر دیا ہے۔
سپریم کورٹ نے یہ فیصلہ ایس این جی پی ایل کیخلاف درخواست دائر کرنے کے کیس میں جاری کیا۔فیصلے کے مطابق عدالت عظمیٰ نے غیر ضروری اور گمراہ کن درخواست دائر کرنے پر جرمانہ کیا اور جرمانے کی رقم کسی فلاحی ادارے کو دینے کی ہدایت کی۔
عدالت نے کہا کہ وفاقی محتسب سیکرٹریٹ کا کوئی قانونی وجود نہیں۔ فیصلے میں کہا گیا ہے کہ وفاقی محتسب ذمہ داران کےخلاف کارروائی کر کے 2 ماہ میں رپورٹ جمع کرائی جائے۔
سپریم کورٹ نے اپنے فیصلے میں کہا کہ غیر ضروری درخواست دائر کر کے سپریم کورٹ کا قیمتی وقت ضائع کیا گیا۔ ایس این جی پی ایل کے خلاف شکایت سننا وفاقی محتسب کے دائرہ اختیار میں ہی نہیں تھا۔ وفاقی محتسب کا کام بد انتظامی کےخلاف شکایتیں سننا ہے۔فیصلے میں کہا گیا ہے کہ متاثرہ فریق نہ ہونے پر وفاقی محتسب سیکرٹریٹ کو درخواست دائر کرنے کا حق نہیں تھا۔
