وزارت خارجہ کو نواز شریف کے ناقابل ضمانت وارنٹ پر عمل درآمد کرانے کا حکم
لاہور: احتساب عدالت نے پلاٹ الاٹمنٹ ریفرنس میں وزارت خارجہ کو نواز شریف کے ناقابل ضمانت وارنٹ پر عمل درآمد کرانے کا حکم دے دیا۔
لاہور کی احتساب عدالت کے جج اسد علی نے غیر قانونی پلاٹ الاٹمنٹ ریفرنس کی سماعت کی۔ نیب کی طرف سے اسپیشل پراسکیوٹر حارث قریشی پیش ہوئے۔
دوران سماعت ماڈل ٹاؤن پولیس اسٹیشن کے انسپکٹر بشیر احمد نے نواز شریف کے وارنٹ گرفتاری کی رپورٹ پیش کر دی، جس میں کہا گیا کہ نواز شریف اپنی ماڈل ٹاؤن کی رہائش گاہ پر موجود نہیں ہے، ان کی رہائشگاہ پر مسلم لیگ (ن) کے رہنما عطاء تارڑ نے ملزم کے بیرون ملک ہونے کی تصدیق کی۔ انہوں نے بتایا کہ مزلم 6 ماہ سے بیرون ملک ہیں۔
عدالت نے نواز شریف کے ناقابل ضمانت وارنٹ گرفتاری جاری کرتے ہوئے وزارت خارجہ کو لندن میں پاکستانی ہائی کمیشن کے ذریعے نواز شریف کے ناقابل ضمانت وارنٹ پر عمل درآمد کروانے کا حکم دے دیا۔
واضح رہے کہ نواز شریف گزشتہ کئی ماہ سے لندن میں اپنے علاج کی غرض سے مقیم ہیں۔
