اسلام آباد: پاکستان میں تعلیمی ادارے دوبارہ کھولنے کے متعلق اہم مشاورتی اجلاس آج ہوگا۔ کورونا وبا کے پھیلاؤ کے دوران بند کئے گئے تعلیمی اداروں کو کھولنے یا بند رکھنے سے متعلق فیصلہ آج ہونے والےاجلاس کی صدارت وفاقی وزیر تعلیم شفقت محمود کریں گے، اجلاس میں صوبوں کی جانب سے تیار کردہ تجاویز اور ایس او پیز کا جائزہ لیا جائے گا۔ ذرائع کے مطابق اجلاس میں ایس او پیز اور تعلیمی ادارے و مدارس کھولے جانے کے حوالے مشاورت ہوگی۔
کورونا وائرس کے باعث ملک بھر کے تعلیمی ادارے مارچ سے تاحال بند ہیں اور ذرائع کا کہنا ہے کہ پندرہ جولائی تک کھولے جانے کا امکان ہے۔وزیرتعلیم پنجاب مراد راس نے کہا ہے کہ اگر حالات بہتر ہوئے تو 15 اگست سے سکول کھول دیں گے اور پہلے مرحلے میں ضروری کلاسز شروع کرنے کی اجازت دیں گے۔
وفاقی وزیرتعلیم شفقت محمود کا کہنا ہے کہ نجی سکولوں کی طرف سے تعلیمی ادارے کھولنے کا بہت دباو ہے لیکن ہمارے لیے بچوں کی صحت سب سے اولین ترجیح ہے، جو بھی فیصلہ کریں گے بہت احتیاط سے کیا جائے گا۔ حکومت ایس او پیز کے تحت سکولوں کو کھولنے پہ غور کر رہی ہے اور اس ضمن میں تمام صوبوں کے مدارس اور نجی تعلیمی اداروں سے تجاویز بھی طلب کرلی گئی ہیں۔سکولوں کو کھولنے کا جائزہ لینے کے دوران نیشنل کمانڈ اینڈ آپریشن سینٹر کی جانب سے فراہم کردہ اعداد و شمار کو بھی پیش نظر رکھا جائے گا۔
وفاقی حکومت تعلیمی ادارے کھولنے کی حکمت عملی پر یونیسیف سے بھی مشاورت کر رہی ہے۔ وفاقی وزیرتعلیم کے مطابق تعلیمی ادارے کھولنے کا روڈ میپ تیار ہونے کے بعد والدین کو اعتماد میں لے کر کوئی فیصلہ کیا جائے گا۔
خیال رہے کہ حکومت نے کورونا وائرس کا پھیلاؤ روکنے کیلئے مارچ میں تمام تعلیمی ادارے بند کرنے کا فیصلہ کیا تھا۔ اس وقت وزیر تعلیم نے کہا تھا کہ اگر کورونا وائرس کا مسئلہ حل ہوگیا تو تعلیمی ادارے جون میں دوبارہ کھل جائیں گے۔
