لاہور( لمحہ اِخبار، مانیٹرنگ ڈیسک ) ثمن ذوالفقار پاکستان میں نئی تاریخ رقم کرنے والی خواتین میں شمار کی جاتی ہیں،جنھیں پاکستان کرکٹ میں پہلی خاتون میچ ریفری ہونے کا اعزاز بھی حاصل ہے۔ پاکستان کرکٹ بورڈ نے حال ہی میں ڈومیسٹک کرکٹ سیزن 2020۔21 کے لیے آفیشلز کا اعلان کیا ہے، ثمن ذوالفقار ڈویلپمنٹ پینل میں شامل واحدخاتون میچ ریفری ہیں، ان کا تعلق شیخوپورہ سے ہے اور وہ 9 ماہ کی بیٹی کی ماں بھی ہیں۔
ثمن ذوالفقار نے ثابت کیا ہے کہ خواتین ہر شعبے میں مردوں کے شانہ بشانہ کام کر سکتی ہیں۔ والدین، سوسائٹی اور سسرال والے سپورٹ کریں تو خواتین مردوں کے لیے مخصوص سمجھے جانے والے شعبوں میں بھی کامیاب ہو سکتی ہیں۔
ثمن ذوالفقار کو پاکستان کی پہلی خاتون کرکٹ میچ ریفری ہونے کا اعزاز حاصل ہے وہ 2016 سے اس شعبے سے وابستہ ہیں لیکن ان کے علاوہ اب تک پاکستان میں کوئی اور خاتون اس شعبے منسلک نہیں ہوئی، اس طرح منفرد اعزاز ثمن ذوالفقار کو ہی حاصل ہے۔
ثمن ذوالفقار نے کہا کہ بس تعلیم کے دوران ہی کرکٹ کھیلی ہے، سپورٹس سائنسز میں ماسٹرز کے دوران سب سے زیادہ دلچسپی کرکٹ میں پیدا ہوئی، ماسٹرز کے بعد کرکٹ سے وابستہ رہنے کے لیے امپائرنگ کورس کیا وہاں سے مجھے پتہ چلا کہ اگلی منزل میچ ریفری ہوسکتی ہے، میں نے پھر میچ ریفری کا کورس کیا اور پھر اسے شعبے کو اپنا لیا، مجھے اپنی صلاحیتیوں کو سامنے لانے کے لیے یہ شعبہ اپنے لیے بہتر لگا کیونکہ یہ ایک ایسا کام تھا جس میں آپ کو ارد گرد آمنے سامنے نظر رکھنا ہوتی ہے۔
انہوں نےکہا کہ پاکستان کرکٹ بورڈ کی حوصلہ افزائی سے قبل مجھے اپنے گھر والوں سے بہت سپورٹ ملی، مجھے کام کرنے کی اجازت ملی، میں نے تعلیم مکمل کی اور پھر شادی کے بعد مجھے سسرال والوں نے کام سے نہیں روکا، میں اس لحاظ سے خود کو خوش قسمت سمجھتی ہوں کہ مجھے ہر کسی سے اتنا تعاون مل رہا ہے کہ میری لیے کام جاری رکھنا آسان ہی نہیں بلکہ آگے بڑھنا بھی لیے آسان ہے۔
ان کا کہنا تھاکہ میں یہ اعزاز حاصل کرکے بہت خوش ہوں کہ میں پاکستان کی پہلی خاتون میچ ریفری ہوں اور اب تک واحد خاتون میچ ریفری ہوں، میں دوسری لڑکیوں سے بھی کہوں گی کہ پی سی بی بہت مواقع فراہم کر رہا ہے اس سے فائدہ اٹھائیں۔
اپنے اگلے اہداف کے بارے میں ثمن ذوالفقار نےکہا کہ میں نیشنل لیول پر زیادہ سے زیادہ میچز سپروائز کرنے کے بعد پاکستان سپر لیگ اور انٹر نیشنل میچز میں پاکستان کی نمائندگی کرنا چاہتی ہوں، مجھے امید ہے کہ پاکستان کرکٹ بورڈ مجھے وہ بھی موقع فراہم کرے گا۔
