اخبارسب کے لیے سب کچھ
پنجاب میں روزگار سکیم شروع کرنے کی منظوری ۔ خواجہ سرا بھی قرضہ لے سکیں گے
ستمبر 8, 2020 |
10:10 صبح
لاہور: وزیراعلیٰ پنجاب عثمان بزدار نے پنجاب روزگار سکیم شروع کرنے کی منظوری دیدی ہے۔
وزیراعلیٰ پنجاب عثمان بزدار نے پنجاب روزگار سکیم کو رواں ماہ لانچ کرنے کی ہدایت کرتے ہوئے کہا کہ سکیم کے تحت 30 ارب روپے سے زائد کے قرضے آسان شرائط پر فراہم کیے جائیں گے۔ یہ سکیم اسمال اینڈ میڈیم انٹرپرائزز ڈویلپمنٹ اور کورونا سے متاثرہ کاروبار کی بحالی کے لیے معاون ثابت ہوگی۔ سکیم کے تحت نئے کاروبار یا موجودہ کاروبار کے لئے آسان شرائط پر قرضہ فراہم کیا جائے گا۔
وزیراعلیٰ عثمان بزدار کا کہنا ہے کہ کورونا کے باعث کاروبار متاثر ہوئے، اب ہم اس سکیم کے ذریعے بہت بڑا ریلیف دے رہے ہیں، سکیم کے تحت ایک کروڑ روپے تک کا قرضہ لیا جاسکے گا، مرد اور خواتین کے ساتھ خواجہ سراء بھی قرضہ سکیم سے استفادہ کر سکیں گے جب کہ خواتین کے لئے مارک اپ کم رکھا گیا ہے۔
