ٹریفک سارجنٹ قتل کیس میں عبدالمجید اچکزئی کی بریت کیخلاف اپیل دائر
کوئٹہ : بلوچستان پولیس نے کوئٹہ میں ٹریفک سارجنٹ عطا اللہ کے قتل کیس میں عبدالمجید اچکزئی کی بریت کے خلاف بلوچستان ہائیکورٹ میں اپیل دائر کردی۔
عبدالمجید اچکزئی کی بریت کے خلاف اپیل بلوچستان ہائی کورٹ میں دائر کی گئی جس میں مؤقف اختیار کیا گیا ہے کہ ٹریفک سارجنٹ کےکیس میں استغاثہ کے بیانات کو قابل غور نہیں لایاگیا، ٹرائل کورٹ نے استغاثہ کے مؤقف کو نظرانداز کیا۔ درخواست میں کہا گیا ہے کہ زیر بحث نہ لائے جانے والے نکات کو ہائیکورٹ میں سامنے لانے کا حق رکھتے ہیں۔
واضح رہےکہ 4 ستمبر کو بلوچستان کی ماڈل کورٹ نے کوئٹہ میں ٹریفک سارجنٹ کے قتل کیس میں سابق رکن صوبائی اسمبلی (ایم پی اے) مجید خان اچکزئی کو عدم ثبوت پربری کیا تھا۔ 2017 میں بلوچستان اسمبلی کے رکن اور اس وقت پبلک اکاؤنٹس کمیٹی کے چیئرمین مجید اچکزئی پرسارجنٹ عطاللہ کو گاڑی کی ٹکر سے ہلاک کرنے کا الزام تھا۔ ٹریفک پولیس انسپیکٹر عطا اللہ کی ہلاکت کا واقعہ 20جون 2017 کو کوئٹہ کے زرغون روڈ پر ایک گاڑی کی ٹکر سے پیش آیا تھا۔
