پنجاب روزگار سکیم سے ایک کروڑ روپے تک قرض فراہم کرنے کا اعلان

لاہور: وزیراعلیٰ پنجاب عثمان بزدار نے پنجاب روزگار سکیم کا افتتاح کردیا جس کے تحت آسان شرائط اور کم شرح سود پر 30 ارب روپے کے قرضے دیے جائیں گے۔

وزیر اعلیٰ عثمان بزدار نے لاہور میں وزیر اعلیٰ ہاؤس میں بٹن دبا کر پنجاب روزگار سکیم کا افتتاح کیا۔ تقریب سے خطاب میں عثمان بزدار کا کہنا تھا کہ پنجاب روزگار سکیم کے تحت ایک لاکھ سے ایک کروڑ روپے تک کےقرضے حاصل کیے جاسکیں گے۔

عثمان بزدار کا کہنا تھا کہ پاکستان تحریک انصاف (پی ٹی آئی)کا وژن نوجوانوں کو معاشی طور پر مضبوط بنانا ہے، سکیم سے خواتین مرد اور خواجہ سرا بھی مستفید ہوسکیں گے جب کہ چھوٹی صنعتوں کو بھی قرض دیا جائےگا۔

تقریب سے خطاب کرتے ہوئے وزیر صنعت و تجارت پنجاب میاں اسلم اقبال کا کہنا تھا کہ سابق حکومتوں نے شعبدہ بازی اور کِک بیکس کے لیے منصوبے دیے،جب کہ پنجاب روزگار سکیم عوام کے دل کی آواز ہے۔

تقریب سے صوبائی وزیر خزانہ ہاشم جواں بخت نے خطاب کرتے ہوئےکہاکہ ان کا فوکس روزگار کی فراہمی ہے ،سکیم کا ہر ماہ جائزہ لےکر اس میں مزیدبہتری لائیں گے۔