پاکستانیوں کی اکثریت کو معاشی معاملات پر سب سے زیادہ تشویش
اسلام آباد : آئی پی ایس او ایس کے مطابق پاکستانی عوام کی اکثریت معاشی معاملات پر سب سے زیادہ تشویش کا اظہار کرتے نظر آئے، جس میں مہنگائی پر 36؍ فیصد افراد نے سب سے زیادہ تشویش کا اظہار کیا، یہ شرح گزشتہ سروے کے مقابلے میں 11؍ فیصد زیادہ ہے۔
ریسرچ کمپنی آئی پی ایس او ایس پاکستان کی جانب سے گزشتہ ماہ کیے گئے سروے کی رپورٹ کے مطابق معیشت پر تشویش کا اظہار کرنے والوں کی شرح 74فیصد جبکہ اطمینان کا اظہار کرنے والوں کی شرح 21فیصد سے بڑھ کر 25فیصد ہو گئی۔ آئی پی ایس او ایس کے سروے کے مطابق ملکی معیشت پر بھی عوامی اعتماد بحال نہیں ہو سکا اور 20 میں سے صرف ایک پاکستانی یعنی 6فیصد نے ملکی معیشت کو مضبوط کہا، 41؍ فیصد نے موجودہ معیشت کو کمزور کہا جبکہ 53؍ فیصدافراد نے نہ کمزور نہ مضبوط کہا۔ سروے کے مطابق 56؍ فیصد نے آئندہ 6؍ ماہ میں ملکی معیشت مزید خراب ہونے کا کہا جبکہ 21؍ فیصد نے مستقبل میں معیشت بہتر ہونے کی امید ظاہر کی۔
